يا زول 😊

"زي دخلت العيد البيوت ..

 يا روعتك "

زي وحشة الطفل اليتيم ..

 يا وجعتك

زي لهفة الغايب سنين .. 

يا لوعتك

وكيفن براك تختار تغيب ..

يا قوتك

ولمن تغيب ، بتجُب وراك كل الحضور .. 

يا هيبتك

زي نظرة في عيون عاشقين ، سرقوها كية على الزمن ..

يا طلتك 

زي لعثمة طفلا رضيع ..

يا بسمتك

زي شقشقة غيم السما ..

يا ضحكتك

وزي رعدة بتهز السما ..

يا قسوتك

وكل الدروب متقاطعة فيك .. 

يااا سكتك

ما عرفنا كيف نوصل سماك .. وما عرفنا نوصل حتتك

يا زول رسم كل القصص .. زين حياتنا ورتبا

الدنيا خشعت لي غناو .. وفي حضورو طايعة ، مؤدبة 

اصبحنا مليانين فرح .. واصبحنا مزدانين حُجا 

وبقينا قبال ما يفوت .. راجين يقولو هدااك جا 

راسم ملامحك في القلوب ..

وواشم بسيماتك هنا ..

يا انا .. 

ويا اي زول .. 

ويا كلنا !

 من بعدك الايام خراب .. وفي جوفنا حزنها انفرض 

زولنا البفتش للعلاج .. قبال نئن من المرض 

يوم الفرح .. نلقاهو اول من عرض 

ويوم الفزع شلناك صبر .. ولوكناك قرض 

 يا بسمة في عين الزمن ..

ويا ضيقة موزونة برضا ..

يالفي غلاك ما اظن يكون ..

والفي علاك مالي الفضا ..

لِسّاني بسأل عن وجيع 

ومنو البلاكَ بقول أنا

أمنتك لخلايق الله ..

والقمرة البتجيب الناس ..

 ديمة تضاريك وتزيد حسك 

والطير الحملتو الغناي .. خصّمتو يجيك ، وما يتمسك 

حصناك بكتاب الله .. الدنيا بشرها ما تمسك 

حلفتها بي خلق الله ..

وحق الله ..

وبق الله ..

في يوم بي شرها ما تمسك " 

هو كان ..

 هو كان

كل الكلام بتقال

كان الروح بتتشحتف ؟؟

وكان 

كل الوجع بتقاس ..

منو الاهاتو كان كفّن !

 

و لو كان السواد مطرة

منو الغيماتو ما صبن ؟

 

وكان كل الهموم بتدوم ..

منو الايامو كان عدّن !

 

و اذا كان الغياب محتوم

مراكب اللقيا ما بعدّن

 

وكان ما ضحكة تشفي الروح ..

زمان ارواحنا كان صّدن !

 

و كان سافرت ما ترجع

ابواب اللقا انسدن

 

ولو كان البعد شورة ..

منو الخطواتو كانو مَشَن !

 

و كان فترن قوافي القول

منو البدينا معنى وطن !!!

 

وكان وطنك صغر جواك ..

وقام من وجعو .. غنى .. رطن !

الغريب ..

عندما عاد بعد سنين الغربة وتزوج بفتاته !

اتهمه الجميع بأنه اشتراها بأمواله .. كانو يلاحقونه بنظرات الإدانة في كل مكان ..

لم يفهمو انه عندما غادر ترك خلفه والد مريض ، وأم مكسورة الجناح ، وأخوة لم يبلغو الحلم بعد !

ترك اصدقائه ، أعدائه ، حبيباته القدامة ، أكواب قهوة ما زالت تحتفظ بسخونتها ! 

ترك عشقه للسهر على انغام ضحكات اصدقائه ،ترك حبه لليل وبدله قسرا بروتين صباحي ممل وقاتل !

ترك خلفه احلاما لم يوسعه القدر شيئا سوى أن " يبلها " و يشرب " خيبتها " 

ترك عشقه للعديد من الاماكن و هو يعلم ان الاماكن تحمل " ذاكرة محدودة جدا " ما ان يغيب حتى تنساه و تستبدل هواه بغيره .

عاد مفرغا من كل شئ .. 

وجد أباه وقد انتقل لعالم آخر و لم يستطع ان يقول له حتى كلمة وداع .. لم يستطع حتى أن يسمع منه " عافي منك يا ولدي " 

عاد ليجد أخوة تعودو على غيابه .. واحتاج لأيام وايام ليعود من دور الضيف الى دور الأخ .

الغربة ملعونة ، أخذت منه كل ما ذهب لأخذه منها ..

بحث فيها عن الأمان ، فلم تعلمه سوى الخوف  ..

بحث عن الدفء ، فارتجفت اضلاعه من قسوة برد لياليها ..

تمناها وطنا وأما ، فلم تكن له سوى زوجة أب برغم كل ما أعطاها، كانت تذكره كل ليلة بأنه ابن لامرأة أخرى .

عاد و قايض كل ذلك بتلك الفتاة ..

اصطفاها لتنسيه وجع لياليه ..

هو لم يشترها بأمواله ..

اشتراها بأواجعه ، بالامه ، بسنينه العجاف

يبتغي لديها السنين السمان 

هو اشتراها بسنين عمره

ولم يزايد عليها ..

ما أغلاه من مهر ..

لما العيد يسأل عنك !

ولما العيد يسأل عنك ! 

و ما يلقاك ..

نقول لي شنو ؟ 

خايفين نطراك ونقول غايب ..

يختانا العيد ..

ويقول طيب انا جاي لمنو ؟

لما الفرحة وراك تنقص ..

والضحكة تضيع ..

بلقاها منو ؟

ولما الدنيا تجور بينا .. 

والهم يغلب ..

نشكيو لي منو ؟ 

ولما دموع شفعنا تسيل ..

منو بالضحكة يداويها ..

ولما هموم " أماتنا " تزيد 

منو البالطيبة يواسيها ..

ولما الناس ترجاك في العيد ..

راجين بسماتك عيدية 

والطرقات البيك سارت ..

صارت عرجا ..

وفاقدة دليلا ..

والاحلام البيك الكانت ..

صارت ضلمة ..

انطفى قنديلا ..

والاوطان البيك عاشت ..

يتمت بعدك ..

وعايشة ذليلا ..

يالحاضر بالرغم غيابك ..

والروعة في اقسى معانيها 

 

أمناك كل الغايبين  ..

بلغ دعوانا و تحايينا ..

رسل اشواقنا هناك عندك 

ما الشوق كاتلنا وفاض بينا 

ولسه خايفين  العيد يسأل 

وما يلقاك

 نقول لي شنو ؟ 

خايفين نطراك ونقول غايب 

يختانا العيد 

ويقول طيب انت جاي لي منو ؟؟

ضباح ضباح .. كسرة بي ملاح !

ضباح ضباح .. كسرة بي ملاح ..

واعرف يا ليل .. راجيكٓ صباح 

واكبر يا هم .. مصيرك تنزاح 

ديل الضبحو..

وديل الباعو ..

وديل الخانو  ..

وديل الجدعوه .. 

وديل لي نص النص قسمو ...

ديل الذلو ..

وديل الظلمو ..

وديل الشلّو .. 

وديل الحرموه .. 

 وديل بالكلمة الظالمة رموه ..

لكن ..

في ديل حبّو ..

جوه عيونم ديل شالوه ..

وقت الجوعة ديل جاعو ..

قسمو معاهو " القوت " صامو ..

وقت الهم .. شالو و قسمو ..

ووقت " الزيفة " ديل غطو ..

ووقت " الفيض " ديل ترسو ..

يوم يحزن .. يجرو يعزو ..

ويوم فرحو ..يمشي يباركو .. 

يومو الغاب .. هم الفقدو .. 

ويومو المات .. هم العاشو ..

 

مصير ليلك يجيهو صباح ..

ومصير همك .. يروح ينزاح 

ونملاك تاني غنا و افراح .

ونملاك خير و نملاك فل .. ونملاك نور و نملاك ضل ..

نتم نقصك .. ويعود " نصك " .. نكون حسك ..وتكون نفسك !

نبقى الفاس و نبقى الساس .. وتبقى " التاج " فوق الراس 

نهلل " عودة الغايبين " .. ونقضي الدين عن المديون..و نستر عورة المسكين ..  

ونرقيك بي طه و بي يس .. 

ونسيرك بي العديل و الزين ..

ونسأل كل بيوت الطين ..

ونسال كل نخيل الشوق ..

بيت العرس لي وين .. يقولو لي قدام ..

بيت الفرح لي وين .. والله جاي قدام 💚

لغز الموت .. عمر كمال

أكبر لغز في الحياة هو قطعًا الموت . 

هو ضربة قدر صاعقة لا تفسير لها خارج ( المكتوب ). لذا، تدور كل اسئلتنا الوجوديّة المحيّرة  حوله (احلام مستغانمي) ..

ذلك أنّ لا أحد يدري لماذا يأتي الموت في هذا المكان دون غيره، ليأخذ هذا الشخص دون سواه، بهذه الطريقة لا بأخرى . لماذا هو ؟ لماذا نحن ؟ لماذا هنا ؟ لماذا الآن ؟ او الى اين يذهب  لانه لا أحد عاد من الموت ليخبرنا ماذا بعد الموت. 

#حزن الموت لا يصد ولا يقاوم و هو دائما اكبر منا ولاينفع معه كم التفاؤل الذي نحمله لانه يعرينا امام انفسنا و يشعرنا كم نحن ضعفاء .الموت فقط من يشعرنا دوما بعجزنا باننا مهما ملكنا لا نملك ان نهب من نحب ولو حتى نفس اخر من الحياه .                      

الموت كما يزرع فينا كل الشكوك يعطينا كل الايمان ، يؤكد لنا دائما ان " البقاء لله ".

كل العشم في الموت ان الرحيل يكون دوما الى مضيف افضل ، الى رب احن علينا حتى من انفسنا . #اللهم انا نستودعك روحا طاهره فاضت فينا بكل الخير و سكنت في كل تفاصيلنا #اللهم انه لو كان ضيفنا لاكرمناه و هو اليوم ضيفك و انت اكرم الاكرمين #عمر كان عبيرا فاح على الكل و سيبقى دوما في كل القلوب .

يا يمة 😃 #سهام

# يا قطعة من طين السما و حورية من حور الجنان .. ويا لمعة من نور العيون و حدوتة من قصص الزمان !                                          
  #وانا لسه صغير وحياتك.. محتاج لولايك و التحنيس .. وانا بجري عليك دوم يا يما .. زي شفع كايسين للميس       #ماتشوفي الطول .. و تقولي كبر .. دا طول بالك ..  
 #وما تشوفي الصوت .. وتقولي تخن .. دا حس فالك ..  
 # وما تشكي الحيل .. وتقولي فتر .. ابقى العكاز وابقى  نعالك .. 
#وارجي الافراح .. يادابا بكر .. ومصيرا تروّق وتصفالك  ..                                

# وانسي الاتراح .. خليها تفِر .. تبعد من دربك و من بالك ..

#وماتشيلي الهم .. وما تقولي كتر .. شيلي من الهم وادي عيالك ..

# جاني الزمن حنسني بيك .. قال لي " وحياة والديك " 

#سامحني كان قصرت فيك .. واغفر كمان تعذيبي ليك 

#انسى الفراق وانسى الغياب .. بُعد القراب ، قرب الغراب 

#الشلتو منك يوم مشيت .. والجبتو ليك خلاك بكيت 

#وما عرفت يمة انا شن اقول .. ما حلفني ب " الما بعدو قول " 

#قوم يا زمن وارحل خلاص .. ارحل ولا عتبا عليك 

#ماجبت لي ست الحسان .. خليتا غرة على الجبين 

#خليتا عنوان للفرح .. وخليتا غفران للسنين 

يا يمة ياخ .. 

#سامحت بيك كل الزمن .. كل المحن .. كل الفتن .. وصالحت كل الدنيا بيك 💚

يا_يمة #سهام 

الحياة احيانا فرصة ..

في الحياه هنالك دايماً تلك الفرصة الاخيرة لاستعادة كل ما فقدناه .. المشكله اننا نجد انفسنا امام الخيار بين السعي وراء تلك الفرصة مع احتمال الفشل و الذي سيكون قاتلا و اخيرا .. او اقناع انفسنا بابقاء الوضع على ماهو عليه موهمين انفسنا بالراحه ..الراحه التي نتوهمها بدفن كل ما فقدناه في مكان بعييد حتى عن ايدينا..لاننا لا نريد لتلك الاحلام ان تُنبش !  ولكن كما الجثث تبدا كل تلك المفقودات في التعفن داخلنا و تنغص حياتنا ..ونبدأ بالملل من كل شئ و تفقد كل الاشياء معانيها لدينا .. عندها للاسف لا يكون لدينا سوى خيار واحد فقط.. ان نبدأ التعود على ذلك "المخلوق " الجديد الذي اصبح "نحن " و للاسف لا نعرفه ولا يعرفنا ... الحياة احيانا فرصة ! 

الى مسافر .. " مصطفى حسين "

الى مسافر ...

لمن تملا شنطتك شيل فيها كل الافراح و الاحزان ..شيل خيباتك و امالك.. شيل كل

الذكريات و الاخفاقات.. شيل دعوات الناس و رضاهم عنك و رضاهم بيك.. شيل كل كلمات الوداع و احفظا و اكتبا صدقني حتدفيك هناك.. شيل اي ضحكة و شيل كل دمعة شيل معاك كل التفاصيل صدقني حتحفظك و تغطيك.. شيل مزاراتك القديمة و ايمانك بيها ! شيل زقاقات العباسية و بانت و كل البيوت ! مهما ضاقت الدنيا كانت هي الوحيده الشايلاك ..!  ، احكي ليهم هناك كيف بنقسم الفرح بيناتنا وقت يغشاك تشيل قدرك و تدي الباقي لي يمينك (افراحنا لافه يمين ) ووقت تزعل تطفيو في المكان قَبَلو ، لازم تغشى شارع المين و ما تقول اي شي !!! القولتو يوم دااااك حتشوف صداهو في عيون الناس ، لو رجعت بي علوم اكيييييد لازم تسوقني معاك و اشيلك فوق عيون راسي ! و اقفل شنطتك وما تجيب طبله ولا مفتاح دعوة امك حتغطيك ! و لمن تمشي على الميزان حيقولو ليك وزنك تقيل , فضي الشنطة !!! قول ليهم اخلي شنو ولا شنو ؟! دي شايل فيها ايامي و احلامي و سنين عمري ..دي الامي و امالي و قصص بدري ..دي فرحتنا و لمتنا و ونستنا و قعدتنا و ضيقتنا و زعلتنا و ضحكتنا و كل الشفتو في عمري .. حيمشي معاي و بجيبو معايا يوم ارجع !! حيقول ليك شنو البضمن انو ف يوم تقوم راجع ؟؟ ...نضمن كييييف !!!.. قول ليهم و حاااااااااااات العُشرة و الايام جاي راجع " 💚

#مصطفى_حسين 

عندي فكرة 💡

عندي فكرة اضوي بيك .. يوم ما القمر يرحل يغيب ... وعندي فكرة اداوي بيك .. وبيكي الجراح تشفى وتطيب !                            

عندي فكرة تجيني " انتِ" و يمشي " هم " ونبقى " نحن " .. عندي فكرة تكوني ضهري .. وتزيدي " صبري " وبيك اعدي اي محنة !   

عندي فكرة تكوني للبردان غطا ..وتكوني للشفقان رضا .. وتكوني للمسكين امان !        عندي فكرة تكوني للايتام سند .. وتكوني للعاقر ولد .. وبيكي يتحدى الزمان !              

عندي فكرة تكوني للغايب وطن .. وتكوني للملهوف سكن ..وتكوني عكاز العمى .. عندي فكرة تكوني مرسى.. وبيكي انسى ..وتبقي لي نجم السما !                                         

عندي فكرة تكوني طمبورة غناي .. وتكوني ترنيمة دعاي .. واتقوى بيك ساعة المحن           عندي فكري تكوني امالي ومناي .. وتكوني تسبيحي في صلاي .. واتضارى بيكي من الزمن !                                               

عندي فكرة تكوني لاطفالنا عيد .. وتكوني للعابد مسيد.. وتكوني للعشاق غنا ..عندي فكرة انادي بيك زولي البعيد .. وتبقي لي وطني النشيد ..واتقوى بيك ساعة العنا                                                     

عندي فكرة بيكي اتحصن وانوم.. وبيكي اتسحر واصوم .. واصليكي نص الليل اقوم !  عندي فكرة احجي بيك ناس الفريق ..وتكوني قشتي للغريق.. وتكوني للغايبين وطن !                                                

عندي فكرة ..تظلي فكرة ..وتكوني بكرة .. واضاريكي من شر العيون ومن شر حاسد كان حسد !                                          

عندي فكرة تكوني غير .. وتكوني خير وتكوني لي اسراري بير وتكوني نسمتي في الهجير وكل من طراك دايما فرح !                  

عندي فكرة تكوني لي احلامي " يوسف " وتكوني في الحوبات " خديجة "  وابقى بيك " عيسى المسيح " وتكوني لي امي " البتول "                                              

عندي فكرة كل الدروب بيك تنتهي .. وكل القلوب ليك تشتهي .. وكل القصص بيك تزدهي و تكوني لي الدنيا للسلا م ..             

دا كلو فكرة ❤